الشعر من مسمياته أنه لسان حال الوطن وأهله .. والشاعر هو نحات المشاعر ومفجرها ووووووووووو كل ماهو جميل ونبيل .. والشعر فى بساطته . وهو السهل الممتنع ! وووو
وإسمحوا لى بأن أنقل اليكم ديوان كامل لشاعر عاميه اكثر من رائع . بل هو مقياس من مقاييس الروعه بكل ماتحمل الكلمه من معانى .. وسوف انقل ديوانه بالكامل وبدون إنقطاع ,. هو شاعر مُحترف تنافس عليه صحيفتين من أوسع الصحف المصريه إنتشاراً . الدستور أولاً . ثم المصرى اليوم .
كان يكتب شعره فى صحيفة الدستور تحت عنوان ( كله من ده ) وفى المصرى اليوم يكتب تحت عنوان ( سلامات ) انه الشاعر الأكثر من رائع علــى ســلامه .
وسوف أنقل لكم فى كل مداخله أكثر من خاطره من خواطره الغير مسبوقه فى روعتها وبساطتها .
========================================
وسط البلد ..
=========
على حد عِلمى ..
إحنا وإسرائيل حبايب !!!!!!!!!
وفيه سلام .. ومفيش حرب
طب الظُباط والعساكر دول ...
بيعملوا إيه بقى فى ميدان طلعت حرب ؟
فى وسط البلد
بنت وولد
بيشوفوا بلوزه تليق على الإشارب !
بيحلموا . وبيغنوا .
وأجمل مافى غناهم ..
إنه طالع من القلب ..
من إمته العِشق بيموت من الخوف ؟
ومن إمته الحِلم بيخاف من الضرب ؟
===============================================
تُراب السفر !!
==========
أنا بان على الكِبر
ولا تراب السفر
ولا ده شكل الخوف !
من غير ونس !!!
ياقمر ..
أنا بان على الزمن
واللا ده رُخص التمن !!
واللا دى غُربة روح !
وسط الصحاب ياوطن !
أنا بان على الهوان !
واللا ده إيه . ده كمان
ودى دموع الفرح ..
واللا دموع أحزان ؟
==========================================
بقيت اخاف !
==========
بقيت أخاف من طبيب الأسنان !
ومن كل الطيور .. حتى الكروان
وم الشاى اللى فى الُدكان
وم السُكَر .
ومن الحادق ومن الحراق
ومن الحلاق !!!
ومن عسكرى ومن الاتوبيس
ومن إبليـس !!
من الشارع والرصيف والرغيف !
وأخويا الضعيف !
وقطر السكه الحديد
مش هو (لقمح)برضُه
زمان كان له عيد !
وكان له غنوه حلوه .
فى كتاب الأناشيد ..
بحبك يابلدنــا ..
بس يابلدنا ..
من بعيد لبعيــــد !!
=========================================
ورحمة اُمى !
=============
عندنا هرم .. وعلم .. وأعياد للطفوله !
وعيادات للعلاج .. بس على طول مقفوله !!
وأرقام تليفونات .. وقت الأزمات !! مشغوله !!!
وعندنا ألف جامعه !!
وشكوكو وأبو لمعــه !!!!!!
وناس طرشه .. بس سامعه !!!!
وكراسى كــتيــر مسئولـــــــــــــه !!!!!
وعندنا أولاد فى الشوارع
لا راحو كى جى وَن
ولا شافوا سنه أولــى !!!
بتتكلم جد ؟؟؟
آه . ورحمة اُمى واُمــك
معقولــه !!!
========================================
مِــرايــا !
==========
قُلت أبُص فى المرايا
يمكن أكون إحلــويــت !
فضلت داير أبُص
مخلتش ولا مرايا فى البيت
فى الحمام وفى الأوده وفى الدولاب
أو متعلقه فى الحيط .
شوفت .. سِكِــت . شويه وبعدين إتخضيت !
معقول أنا قضيت العُمر ده كله
وزى مارحت زى ماجيت !!
معقول أنا عُمرى مافكرت ولا إتغيرت ولا حبيت !
وإزاى ساكِت على رُوحى . ده كله .. وليه إستنيت ؟
ياريتنى ماكان عندى مرايا
وياريتنى مابصيت .
=============================================
